روزہ پرہیز گارانہ زندگی کا تربیتی کورس ! محمد قمر الزماں ندوی ۔۔۔۔۔۔۔۔۔۔۔۔مدرسہ نور الاسلام کنڈہ پرتاپگڑھ

روزہ پرہیز گارانہ زندگی کا تربیتی کورس ! 

محمد قمر الزماں ندوی ۔۔۔۔۔۔۔۔۔۔۔۔

مدرسہ نور الاسلام کنڈہ پرتاپگڑھ 9506600725

  

 یقینا ماہ رمضان ایمان والوں کے لئے ایک روحانی سفر کے مانند ہے،اور اس ماہ میں روزہ پرہیز گارانہ زندگی کا تربیتی کورس ہے ، چونکہ اسلام پرہیز گاری کا نام ہے،اس لئے اسلام کی تمام عبادات و اذکار میں بنیادی طور پر تقویٰ و پرہیز گاری ضرور پوشیدہ اور پنہاں ہے ، اور خاص طور پر روزہ کا تو بنیادی مقصد ہی تقویٰ و پرہیز گاری کے اوصاف اپنے اندر پیدا کرنا ہے تاکہ بندہ لعلکم تتقون کا مصداق بن جائے ۔

یہ حقیقت مسلم ہے کہ اسلام نے جتنی عبادتیں فرض کی ہیں ،ان میں انسان کی تربیت اور اصلاح کا پہلو بھی ملحوظ ہے ،روزہ بھی ان ہی عبادتوں میں سے ایک ہے ،جس میں نفس کی تربیت اور تزکیہ کی غیر معمولی صلاحیت ہے ،قران مجید نے اسی حقیقت کی طرف اشارہ کرتے ہوئے کہا ہے کہ تم پر روزے اس لئے فرض کئے گئے ہیں ،تاکہ تمہارے اندر تقویٰ پیدا ہو ، کتب علیکم الصیام کما کتب علی الذین من قبلکم لعلکم تتقون(بقرہ 183/) 

تقویٰ کا لفظ عربی زبان کا لفظ ہے، جو وقایہ سے ماخوذ ہے ،وقایہ کے معنی انتہائی درجہ حفاظت کے ہیں ،، الوقایة فرط الصیانة ،، 

تقویٰ کے معنی جہاں بچنے کے ہیں، وہیں احتیاط ،ڈر، خوف و خشیت اور لحاظ کے بھی ہیں اور قرآن مجید میں متعدد مواقع پر یہ لفظ اس معنی اور مفہوم کے لیے استعمال ہوا ہے ،گویا محض اللہ تعالیٰ کے خوف سے آدمی اپنے آپ کو گناہوں سے بچائے رکھے ،اسی کا نام تقویٰ ہے۔ اسی کو علماء اور اہل علم و فضل نے مختلف الفاظ سے تعبیر فرمایا ہے ،حدیث شریف میں خود نبی کریم صلی اللہ علیہ وسلم کا ارشاد منقول ہے کہ جب تک بندہ گناہ کی باتوں سے بچنے کے لیے از راہ احتیاط بعض جائز باتوں سے بھی اجتناب نہ کرے متقیوں کے درجہ کو نہیں پہنچ سکتا ۔ (مستفاد تفسیر کبیر 1/ 381/) 

  روایت میں ہےکہ حضرت عمر فاروق رضی اللہ عنہ نے ایک مرتبہ حضرت ابی بن کعب رضی اللہ عنہ سے تقویٰ کے بارے میں دریافت کیا ،تو حضرت ابی بن کعب رضی اللہ عنہ نے ایک بہترین مثال کے ذریعہ تقویٰ کی حقیقت اور اس کے مفہوم و مراد کو سمجھایا ، حضرت ابی بن کعب رضی اللہ عنہ نے عرض کیا کہ کیا آپ کبھی کسی خار دار راستہ سے گزرے ہیں ؟ حضرت عمر رضی اللہ عنہ نے فرمایا: ہاں ،حضرت ابی رضی اللہ عنہ نے دریافت کیا کہ اس موقع سے آپ نے کیا کیا؟ فرمایا ، میں نے پائنیچے اٹھا لئے اور احتیاط سے کام لیا ،،تشمرت و حذرت ،،۔ حضرت ابی بن کعب رضی اللہ عنہ نے فرمایا کہ اسی کا نام تقویٰ ہے ۔( تفسیر قرطبی 1/ 168)

گویا دنیا ایک راہ گزر ہے، جو کھار دار جھاڑیوں اور جنکھڑوں سے گھری ہوئی ہے ،یہ جھاڑیاں خواہشات اور گناہوں کی ہیں، جو انسان کے دامن عمل سے لپٹ جانا چاہتی ہیں ،متقی شخص وہ ہے جو اپنے ایمان و یقین اور عمل و کردار کے دامن کو اللہ تعالیٰ کی نافرمانیوں اور عصیان شعاریوں سے بچا کر دنیا کا یہ پر خطر سفر طے کر لے ۔

اس طرح تقویٰ ایک جامع لفظ اور وسیع اصطلاح ہے ،جو خیر کی جملہ باتوں کو شامل ہے ۔ اسی لئے ارباب قلوب کہتے ہیں کہ متقی وہ ہے کہ جو کچھ کہے ،اللہ کے لئے کہے اور جو کچھ کرے اللہ تعالیٰ کے لئے کرے ۔ من اذا قال قال للہ ومن اذا عمل عمل لللہ ۔(مستفاد از شمع فروزاں کالم 3/ مئی 2003/ بحوالہ رمضان ایک روحانی سفر صفحہ 89- 91)

     روزہ کی فرضیت کا مقصد بھی یہی تقویٰ اور پرہیز گاری بندے کے اندر پیدا کرنا ہے کہ بندہ اس ماہ میں خاص طور پر اپنی خواہشات کو قابو میں رکھے اور جذبات تلاطم سے اپنے کو بچائے اور دیگر گیارہ مہینے اس کے اثرات کو اپنے اندر منتقل کرے اور انہیں باقی رکھے ۔ 

غرض اس سے یہ ظاہر ہوا کہ روزہ ہمارے لئے ایک قسم سے روحانی علاج کے طور پر فرض ہوا ہے اور اس کا مقصد نفسانی خواہشات کو کم کرنا اور اس کو کچلنا ہے، تاکہ نفس کو تقویٰ پر قوت ملے اور سچائی یہی ہے کہ روزہ کی روح اور مشروعیت کا راز اس قوت کو کمزور کرتا ہے جو شر و فساد پر ابھارنے کے لیے شیطان کے وسائل و ذرائع ہیں ۔ 

  خلاصہ یہ کہ روزہ کا مقصد اصلی روح و نفس کا تزکیہ اور خدائے وحدہ لا شریک کی رضا مندی کے لئے صبر و شکیب کی کیفیت اور ہمت و طاقت کا فائدہ حاصل کرنا ہے اور اپنی محدود اور فانی زندگی کو تقویٰ و طہارت کی خوشبو سے معطر اور پاکیزہ کرنا ہے اور اسی مقصد کے لیے اللہ تعالٰی نے اس عبادت کا اپنے بندے کو مکلف بنایا ہے اور اس عبادت کی عملی صورت گری فرمائی ہے ۔

نوٹ / رمضان المبارک کے ان مبارک ایام میں اگر ممکن ہو تو ہمارے مدرسہ کے لئے جو بھی مخلصانہ تعاون کرسکتے ہیں ضرور کریں اور مجھے اس کا اسکرین بھیج دیں ۔

*9506600725* *Phone pey no*

اکاؤنٹ نمبر مدرسہ

Account Name and Number

MADRASA NOORUL ISLAM

A/c No.: *6743002100000304*

IFSC.: *PUNB0674300*

*Punjab National Bank.*

Branch- Kunda

Pratapgarh, U.P. (India)